I

Рацæицудæи нихæсмæ
Федоги фурт Дзиддзил,
Цæрмин ходæ фур фæрсмæ,
Æ кæрцæ фур дивил.

—Фæцæй уе 'хсæн мæ фидæ
Дæс анзи федеузег,
Дзиллæн лæгъуз нæ уидæ,
Федауцæ мæгур лæг...

Уæ хæццæ нур нихæси
Дзубанди нæ бæттуй,
Сæйгæй лæууй нæ къæси,
Нæтуй, мæгур, нæтуй.

Уой куст есун мæхемæ,
Не 'содзæнæн нихъог,
Райсетæ мæ уæхемæ,
Ниссагътæ мæ федог!..

—Куста дзæбæх дæ фидæ,—
Зæгъуй ин уæд æмбурд,—
Ду ма нерæн минги дæ,
Не 'содзæнæй дæ дзурд!
Дзиддзил, мæгур, нинкъардæй,
Нийвадзей гетенау,
Дор ин цума ниввардæй
Æ зæрди фур уæззау...

Цъæхгон зиннуй æрдозæ,
Цæстæн рæвдуд дæдтуй...
Борæмæлгъæ мед къозæ
Алли 'взагæй цæгъдуй...

Федзулдæнцæ хонсартæ,
Фетингдæр æй и бон,
Мед къозмæрæй гъе уартæ
Ферттевуй дзæкъолон...

Йес ма метæй гæппæлтæ,
Уадусмæ сæ æхснуй.
Хумзæнхитæй хускъæлтæ
Мæгур цъигъин хæесуй.

Цæттæ кæнуй хумæмæ
Алке дæр æ дзубур.
Дзиддзил кæсуй зæнхæмæ
Фæсвæди зæрдмæгур...

Зæрди буни зин хъурмæ
Мæти хæццæ тухсуй,
Йес ин, бæргæ, еу хумæ,
Низгелун æй гъæуй...

Ка ратдзæнæй æ галтæ,
Ка ратдзæнæй дзубур?
Ходунцæ йбæл и хъалтæ:
— Мæгур æма мæгур!
1916