Бæргæ ниццæгъдуй
И Уази фиййау
Æ даргъ хæтæлæй
Сау хонхи фиййаумæ:
—Уой, ку фесафдтæн,
Ку исцæунцæ
И  Биаслантæ
Дууадæсемæй!
Дууадæсемæй,
Тухæ кæпунмæ,
Тухæ кæнунмæ,—
Мæ фонс йесунмæ!
Бæргæ ниццæгъдуй
Сау хонхи фиййау
Уæд даргъ хæтæлæй
Уази фиййаумæ:
—Уой, ма тæрсæ, ма,
Мæ уарзон лимæн!
Дæ дзоги æхсæн
Йес стур сау сæгъæ,
Дæ иуазгутæи
Ду йеци сæгъæ,
Таведзæгæнгæ,
Ракосарт кæнæ.
Сæ хуæрди усми
Фæффæдес кæнæ
Дæ фонсмæ, цума
Сирд лæборæг йес.
Дæ рауади-йеу
И баси агæ
Ду ракъуæрдзæнæ
Дæ галеу къахæй.
Уæд фесæфдззенæй
Хуцауи фæндæй,
Хуцауи фæндæй
Дæ тухгин æзнаг!
Уæд ку схъæрттæнцæ
И Биаслантæ
Сæумæ рагиау
Уази фиййаумæ.
Ракосарт кæнуй
Æ иуазгутæн
Æ сау нæл сæгъæ
И Уази фиййау.
Сæ хуæрди усми
Фæффæдес кæнуй,
Æ фонсмæ цума
Æрбалæбурдæй.
Æ рауайунбæл
И баси аги
Æ галеу къахæй
Ку рацæй къуæрдта.
Ку рахæлеутæ 'й
И циуан агæй
И сау зæнхæбæл
И тæвдæ басæ.
Уæд йе 'рбаздахтмæ
Уази фиййауæн
Æ иуазгутæ
Ниддæргъмитæ 'нцæ,
Ниддæргъмитæ 'нцæ
И зæнхи астæу,
Ра-сæбæл калдæй
И тæвдæ басæ.
Бæргæ ниццæгъдуй
Уæд даргъ хæтæлæй
И Уази фиййау
Сау хонхи фиййаумæ:
— Тæрегъæд гъуддаг
Цæмæн бакодтай?
Фæццæгъдуни 'ицæ
Мæ иуазгутæ,
Нæ ниттайдзæнæй
Уони тæрегъæд,
Уони тæрегъæд,
Мæ уарзон лимæн.
И сау зæнхæ дин
Дæ мед бунати
Ку ниттондзæнæй
Хуцауи дзурдæй...
Ку ниццæгъдуй уæд
Сау хонхи фиййау
Æ даргъ хæтæлæй
Уази фиййаумæ:
— Мæгур адæмæн
Тухгæнæгæ ка уа,
Йе де 'уазгутау
Фудфæндаг фæууа...
Нур йеци исæфд
Фæди фæдмæ дæр
Нæ тухгæнгутæн
Дæнцæн байзайа!
Нур уоци коймæ
И Биаслантæн
Хауæг бæласау
Сæ нифс бассгтта!..

1923