СКЪÆВДИ ГЪАРÆНГÆ
Цъагх зæлдæбæл сау бæхгинтæ,
Еугурæй дæр арцæгинтæ —
Уох, æна, ци кæнон...
Фæххæссунцæ мæн фæрбунæй,
Ци унгæг дæн, ци, ме 'рхунæй,—
Уох, æна, ци кæнон...
Нанамæ мин ка бауайа,
Бабай цирт мин ка бахуайа? —
Уох, æна, ци кæнон...
И цъалай буни ме 'рвадзе,—
Маг бони радзе, мæ радæ,
Уох, æна, ци кæнон...
Мæ киндзхонтæ нæ къæсæрмæ
Ку нæ зиннунцæ мæ гъæрмæ,—
Уох, æна, ци кæнон...
Мæ фæрдгутæ нæ сиребæл
Ку фæууагътон æнæдзебæл,—
Уох, æна, ци кæнон...
Мæ болат кæрдæн цетени,
Мæ болат æрций гетени,—
Уох, æна, ци кæнон...
Уони хæццæ мæ судзинæ,
Нæ уæлкъурту мæ уфтинæ,—
Уох, æна, ци кæнон...
Нур ме 'ной, ме 'ной æнгартæ
Куд кæндзæнæнцæ мæ зартæ,—
Уох, æна, ци кæнон...
Мæ ниййерæги дзæгъæлти
Ку ниууагътон æнæнгъæлти,—
Уох, æна, ци кæнон...
Ци кæндзæенæн, ци, ме 'нкъарди,
Мæ ниййерзæзей идарди,—
Уох, æна, ци кæнон...
Цъæх зæлдæбæл сау бæхгинтæ,
Еугурæй дæр арцæгинтæ,—
Уох, æна, ци кæнон...
1924
Гулæр