I

Устур Дигори
Устур нихæси
Æримбурд æнцæ
Дигори адæм.
Кæрæдзей фæрсгæ
Ку дес кæнукцæ:
—Ци 'й, цæй гъæртæ 'нцæ
Нæ уæлцъететæ?
Цитгин Хæреси
Уорс хонхи сæри
Цæбæл тохунцæ
Уорс йелиатæ?
Уорс йелиатæ
Нæ уодзæнæнцæ —
Уæхадæги фурт
Мингий Гуймани
Топпи гæрæхтæ
Ку уодзæнæнцæ.
Ка фæццæудзæнæй
Уорс хонхи сæрмæ?
Ка базондзæнæй,—
Ци гъæртæ цæуй?
Уæд рагæпп кæнуй
И бадæн дорæй
Гуймани æрдхуард
Биати Хъасбол.
—Фæццæудзæнæн æз
Уорс хонхи сæрмæ,
Ку никкæсисæ
Айнæги бунмæ...

III

Айнæги бунмæ
Бæргæ никкæсуй
Биати Хъасбол,
Гуймани æрдхуард.
Æдтæгуæлетæ
И дзæбодуртæ
Айнæги буни
Бæргæ лæуунцæ.
Басоцъа кæнуй
Гйаури зæрдæ.
Æрбалæуун кæнуй
Мингий Гуймани
Айнæги нихмæ.
Айнæги нихæй
Уой ку фенсонуй
Æ йеугур тухæй
И палат æлгъист.
Уæд ку рахауй
Айнæги бунмæ
Уæхæдæги фурт
И мингий Гуйман.
И къæбуртæбæл
Ку ниммортæ уй,
Ку ниммортæ уй,
Тог иурхæнгæнгæ.

IV

Ку æрхæццæ уй
Æ цауæйнон куй,
Селон ка хундтæй
Уæд хæдзарæмæ.
Бæргæ ниннеуй
Зæрдæ унгæгæй
И бийнонтæмæ.
Уæд ку нимбохуй,
Ку нидздзиназуй
И мади зæронд,
Æ киндзæ 'рдæмæ
Уæд ку февналуй:
— Мæ арти уазал,
Мæ йеунæг  фуртбæл
Цидæр ку 'рцудæй!

V

Фæффæдес унцæ
Уæд гъæууон адæм,—
Селони фæдбæл
Исцæй цæунцæ
Айнæги бунмæ.
Айнæги бунæй
Бæргæ райсунцæ
Уæхадæги фурт
Мингий Гуймани.
Ку æрхæссунцæ 'й
Æ хæдзарæмæ,—
Намусти хæццæ 'й
Банигæнунцæ.

VI

Биайи-фуртбæл,
Гйаур иалатбæл
Уæд райдæдтонцæ
Гурусхæ кæнун.
И хисти бони
Уой ракæнунцæ
Тургъи астæумæ:
— Топп ку фехсдзинан
Мах арвæрдæмæ.
Дæ фидбилизæй
Кæд неци 'рцудæй
Де 'рдхуард Гуйманбæл
Уæд топпи фат дæр
Нæ багездзæнæй
Дæу йе 'рæздагъди.
Фал де стур лимæн
Дæу лази фæрци
Кæд рацæй-хаудтæй
Айнæги сæрæй,
Уæд топпи фат дæр,
Ку æрцæй-хауа.—
Дæ тæккæ сæри
Ку ниссæдздзæнæй.

VII

Топп ку фехсунцæ
Арвæрдæмæ...
Ку нигъгъос унцæ
И хисти адæм.
Йеу усми фæсте
Фат ку 'ртъупп кæнуй,
Хъасболи сæри
Ку ниффедар уй.
Ку базонунцæ
Уæд гъæууон адæм,
Биати Хъасбол,
И гйаур налат
Ке рацæйгæлста
Лимæн-æууæнкæй
Уæхадæги фурт
Мингий Гуймани.

1923