СЫГЪДÆГ СЫФЫ МОНОЛОГ
Сыгъдæг дæн æз. Ыстъалыйау – рæсугъд,
Æрвон зæдау – бæрзонд æмæ æназым.
Сывæллонау, æгæрон цинтæ нуазын
фæфæнды мæн. æлутон мын хæссут!
Йæ худ мын сисы алы хатт рæстуд,
Æмæ æз дæр – мæ зоныгыл йæ разы.
Æвæры уый йæ сагъæстæ тæразыл –
бæрзонд рæстдзинад йе стырдæр мæт у.
Фæлæ сымах та, хахуыртæ, цы стут?!
Æвзидут мæм цъыф дзæмбытæй, уæ фазыл
бырсут мæнмæ, æмæ уын зæхх фæразы
уæ магъзы сау æмæ уæ уды тутт...
Фæлæ рæстуд нæ уадзы мæн дзæгъæлæй,
Æмæ мæлын уæ тухитыл кæл-кæлæй.