СОНЕТ
Дæ цæстыты цыдæр уæлтæмæн ис,
дæ мидбылхудт – æвзонг бæрзы æнгасау,
дæ хъарм ныхас – уæздан зæды ныхасау,
дæ фезмæлды – мæ цин æмæ мæ дис.
Ехх! Царды бæллиц рог базыртау сис
æмæ ыстæх уæлбыдыртæм цæргæсау,–
дæ уарзты тых дын рагуалдзæг куыд хæсса,
цъæх арв та дын куыд агайа дæ рис.
Дæ цæстысыг цæппузыргай куыд судза,
йæ пиллонæй æрвон тар куыд рæмудза,–
куыд ивыла æгæрон арфмæ рухс.
æгæрон арфы райгуырдзæн æнус,
ныггуыпп ласдзæн æрвдзæф æнусон тулдзау,–
æмæ-иу уæд йæ диссаг мыртæм хъус!..