ЗАРÆГ
Бахсæв и, бæстæ ныссабыр...
Кочысаты М.
Фестъæлфы, стъалыйау, сау мыр:
Ысс! – зæгъгæ, бахаты,– хъус!
Ахсæв та дуне ныссабыр,
бафынæй мæйы уæлхъус.
Мæйы æвзист уадындз, зар мын
рухс фынтæ сау нымæтыл,–
Авд хойы цавæрдæр суармæ
згъорынц æрфæны фæдыл.
Семæ – мæ рагбæллиц-уарзон,
хуртæ-мæйтæй фæлыст чындз,–
ссардтой нæргæ уарзты суадон
Æмæ сæ дойны сæттынц...
Ахастой дзагæй къæртатæ,
байсæфт сæ фæдыл мæ цин,–
райхъал дæн джихæй, æнкъардæй,
атахт фыны бардуаг – зин.
Райхъал дæн, æмæ мæ сур хид,
ме зæд, рæвдаугæ сæрфыс,–
айсæфт мæ катай, мæ тухи,
бабын, мæ фынау, мæ рыст.