Сырдонмæ уыдис иу хæрзхаст тохъыл,
Æмæ йын, зæгъы, нарты фæсивæд
Бахъавыдысты йæ бахæрынмæ.
Ну бон та ныхасы бадтысты æмæ,
Сагъæсгæнæгау, дзурынц Сырдонмæ:
«О, Сырдон, хъаймæт æрхæццæ кæны:
Æвгъау у дæ тохъыл афтæмæй сæфынæн,
Фæлтау æй аргæвдæм уæртæ доныбыл,
Æскæнæм дзы уым бур физонджытæ,
Æмæ уæд хуыцау кæсдзæн æмæ махмæ».
Сырдон сразы ис, уæлдай нал загъта...
Иу хур бон куы уыд, уæд нарты 'вдæлонтæ
Доны былмæ сæхи хъæлдзæгæй айстой.
Сырдон дæр йæ тохъыл уырдæм аласта;
Иу бæласы бын æрбынат кодтой,
Æмæ раргæвстой Сырдоны тохъылы,
Æнæзивæг æй асыгъдæг, кодтой.
Цалынмæ Сырдон кусарт цæттæ кæна,
Уалынмæ нæхи ауазал кæнæм,
Загьтой сæхицæн нарты 'вдæлонтæ.
Уайтагьд сæ дзауматæ раластой æмæ
Рæсугъд доны сæхи найын байдыдтой.
Сырдон баззади кусарты уæлхъус.
Сæ дзауматæ сын æрбамбырд кодта
æмæ сæ тымбылæй арты бакалдта.
Нарты 'вдæлонтæ сæхи над куы фесты,
Уæд загьтой сæхицæн «Цом ныр æрбадæм,—
Сырдоны тохъылæй нæхи хорз фенæм!»
Фæлæ доныбылмæ куы рахызтысты,
Уæд кæсынц æмæ сæ дарæс нал арынц,
«Нæ дзауматæ нын цы хæйрæг фæхаста?»
Бафарстой Сырдоны нарты 'вдæлонтæ.
— Арты сæ бакалдтон, — дзуапп радта Сырдон.
«Уый та куыд арты у?» бафарстой уыдон.
— Цы. ма сæ кæнут, цы? Афтæ нæ загьтат —
«Хъаймæт уыдзæни?» — загьта сын Сырдон.
Нарты 'вдæлонтæ сæ кæрæдзимæ
Бакастысты, фæлæ ма цы загьтаиккой?!