Нарты Дзерассæ донмæ рацæйцьщ.
Доны хицау Гæтæг рæсугъд Дзерассæмæ
Бахудтис æмæ йæм йæ цæст фæныкъуылдта;
Дзуры йæм: «Уæ, рæсугъд, урсцъар Дзерассæ,
Бауарз мæ, кæннод дын дон нæ раттдзынæн!»
Дзерассæ-рæсугъд фæтарсти Гæтæгæй,
Аздæхт æнæ донæй, сæхимæ бацыдис.
Арасти Дзерассæ донмæ дыккаг хатт,
Гæтæгыл сæмбæлын æнхъæл нал уыди,
Фæлæ та уæддæр йæ разы февзæрди.
Дзерассæ-рæсугъдæн гæнæн нал уыди
Æмæ Гæтæгимæ æмуд æрцыдис.
Дзерассæ-рæсугъдæн лæппу райгуырдис,
Номæй та йæ схуыдтой Гæтæджы фырт Сырдон.—
Уæд хъомыл кæнын Сырдон райдыдта.
Уыди зонынджын, зыдта æппæт дæр,
Цы уыдис æмæ цы уыдзæн, уыдæттæ.
Фæлæ нартимæ æппын нæ фидыдта,
Цыди сыл сайдæй, цыди сыл хинæй,
Æмæ йæ сайдтой нарт сæхуыдтæг дæр.
Кæд æмæ-иу æм нарт рамæсты сты,
Уæддæр æй уарзгæ дæр тынг бирæ кодтой,—
Сырдон уыд зондджын, мадзалджын нæртон лæг.