Нарты Сырдонæн йæ мæлæт æрхæццæ
Æмæ йæ усæн афтæ ныффæдзæхста:
— Мидгьуын кæрц-иу мын сæрд макæд бадар.
Тæвд дзул та-иу мын зымæг макуы бахæр,
Стæй мын уазал дон макæд бануаз,—
Нартæн дæр загъта: — Адæмы хъæлæба
Æмæ фосы уасын цы ранмæ хъуыса,
Ахæм ран-иу мæ ма баныгæнут. —
Сырдон куы амард, уæд уый фыдæнæн
Йæ ус сæрдыгон мидгъуын кæрц дардта,
Зымæг та хордта æдзухдæр тæвд дзул,
Йæ фæстæ та-иу уазал дон банызта.
Æмæ йæ дæндæгтæ азгъæлдысты.
Нарт Сырдоны мард бавæрдтой Ныхасы,
Æмæ-иу кæрæдзимæ куы фæмæсты сты,
Уæд-иу, сæ иу иннæйы афтæ фæлдыста:
«Махæй мæнг чи зæгъы, уый бæх уæд Сырдонæн!»
Уæд нарты адæм сæхицæн загътой:
«Амæн нын йе'гасæй йæ мард фыддæр у.
Бавдæлæм æмæ йæ скъахæм фæстæмæ
Æмæ йæ уæртæ фурды баппарæм!»
Скъахтой йæ æмæ йæ фурды баппæрстой.
Хин Сырдон уыдис Донбеттыры хæрæфырт,
æмæ куыддæр йæ мард фурды бахауди,
Афтæ райгаси æмæ та фæстæмæ
Уайтагъд балæууыд нарты Ныхасмæ.
Нарт æй куы федтой, уæд дисгæнгæ загътой:
«Сырдонæн мæлæт дурты бын дæр нæй!».