Нартæн сæ хисдæр уæд Уæрхæг уыдис.
Уæрхæгæн райгуырдис дыууæ лæппуйы,
Дыууæ лæппуйы — дыууæ фаззоны.
Иу дзы райгуырдис фыццаг кæркуасæны,
Иннæ та райгуырдис дыккаг кæркуасæны,
Бонвæрноны скастмæ. Уæрхæджы зæрдæмæ
Рухс хуры тынтæ уæд ныккастысты —
Хъæбулы ад Уæрхæг фыццаг хатт базыдта.
Йæ фыртты райгуырды стыр боны фарнæн
Нæртон куывд æскодта сыгъдæг сырды фыдæй, —
Æрхуыдта уæларвæй Куырдалæгоны,
Нартæй — Борæйы йæ кæсдæртимæ,
Донбеттыры та — стыр фурды бынæй.
Зæронд Уæрхæджы уарзон лæппутыл
Буц нæмттæ сæвæрдта уæларв Куырдалæгон:
Хисдæрыл — æхсар, кæсдæрыл — æхсæртæг.
Радта Куырдалæгон номæвæрæггаг
Уæрхæгæн удæвдз йæ куырдадзы фæтыгæй,
Удæвдз уыд арæзт болат æндонæй.
Нарт уыцы удæвдз сæ фынгыл сæвæрдтой,
Æмæ сын кодта диссаджы зарджытæ,
Диссаджы зарджытæ уадындз хъæлæсæй:
Айс æй, аназ æй хуыцауы хæларæй,
Айс æй, аназ æй ронджы нуазæн!
Æмæ иннабонæй уæд иннабонмæ
Минас фæкодтой Уæрхæджы уазджытæ.
Стæй уæд фæскуывд фæфардæг æсты:
Куырдалæгон абадт цæхæр уады хъисыл
Æмæ уæларвмæ ныппæррæст ласта,
Ныппæррæст ласта Пакъуындзæйау.
Донбеттыр та фестад æргъæуон кæсаг,
Æмæ фурды бынмæ ныцъыллинг кодта,
Нарт дæр фæфардæг сты хæтæны, стæронтау.
Айрæзтысты уайтагьд æхсар æмæ 'Хсæртæг:
Бон уылынг рæзтысты, æхсæв та — уыдисн.
Фæлæ тынг фыдуаг рахастой дыууæ дæр:
Сарæзтой сæхицæн фаттæ 'мæ æрдынтæ,
Æмæ маргъ тæхын нæ уагътой арвыл, —
Æрмийæ-иу æй æрæппæрстой.
Айхъуысти дунейыл: нарты Уæрхæгæн
Рахъомыл дыууæ хъæбатыр фырты,
Дыууæ фаззоны — æхсар æмæ æхсæртæг.—
Æхсар, мæ хуртæ, æхсарджын уыди,
Æхсæртæг та ноджы æхсарджындæр уыд.