Нарты адæмæй иу дæр, иннæ дæр
Дзырдта Сырдонæн: «Дæ мæрдтæн хист скæн,
Кæннод æнхъæлцау сты иннæты мæрдтæм;
æмæ цæмæн кæныс дæхи тæригъæдджын
Мæрдты æгъдауæй? Фидис ын кодтой:
«Дæуау исчи йæ мард æгадæй уадзы?»
Уыцы ныхæстæ цæй фæдыл уыдысты,
Уый гæды Сырдон дзæбæх æмбæрста:
Адæмы фæндыди мæгуыр Сырдонæн
Цæмæй йæ иунæг хъуг бахордтаиккой.
Иу къорд рæстæджы Сырдон ныхъуси,
Стæй æрæджиау зæгъы уæд иартæн:
— Уæ, нарт, мæ мæрдтæн цæмæй схист кæнон,
Куы ницы мæм ис, уый хорз куы зонут! —
«æрæмбырд кæн, Сырдон, дæ хæстæджыты,
æмæ дæ лымæнты—фæкæсдзысты дæм,—
Уæддæр дæ мæрдты æнæ хист ма ныууадз!»
Марды кæндæн, зæгъы, цыдæриддæр æмбæлд
Хæрд æмæ нозтæй, уый уæлдайджынтæй
æрæмбырд кодта Гæтæджы фырт Сырдон
Суг дæр æрласта, цас æй хъуыд, уыйас.
æстыр дыхъусыг уæларт бавæрдта,
æмæ байдыдта бæгæны 'хсидын.
Сырдон æрхуыдта бæгæныфыцæгæн |
æдылыдæры. Кæд дыхъусыгæн
Зад хъуыди ссæдз мæрты, уæд дзы Гæтæджы фырт —
Гæды Сырдон та-иу иунæг мæрт ныккодта;
Афтæмæй къорд боны бæгæны фехсыста.
Кæрдзынгæнджытæн дæр æрхуыдта Сырдон
æдылыдæртæ чи уыдис, уыдон,
æмæ сын цалдæр дзулы ракæнын кодта.
Сырдон хисты бон бавдæлдис æмæ
Бæгæныгæнджыты, кæрдзынгæнджыты
æмæ дыууæ æдылы уырдыгстæджы
æрæмбырд кодта æмæ сын загьта:
— Сымах, мæ хуртæ, фыдæбон кæндзыстут,
Раздæр уæ исты ахæрын хъæуы,
Кæннод баззайдзыстут æнæ хæрд, æнæ нуæзт.—
æрбаргæвдын кодта иу-дыууæ карчы
æмæ сын уыдон авæрдта сæ разы.
Фæкаст сæм рагацау нуазинагæй дæр,
Стæй сæ бафтыдта бæгæны кæныныл.
Уалынмæ адæммæ фервыста хонджытæ,
Уырдыгстджыты та быцæуыл бафтыдта:
Цы раздæр равзæрд: айк æви карк?»
Уырдыгстджытæн быцæу бацайдагь.
Сæ иу фæзæгъы: «Раздæр айк сæвзæрдис».
Иннæ фæзæгьы: «Карк раздæр сæвзæрд».
Загъдмæ сын асайдта æмæ райдыдтой
Сæ кæрæдзийы схуыстытæ кæнын.
Сыр дон сын йæхи иргъæвæг акодта,
æмæ йын, цыма, æнæбары уыд,
Уыйау рафæлдæхта бæгæныйы цæхкæртæ
æмæ уый фæстæ æрдиаг райдыдта;
Лæуджытимæ, дын, хыл кæнын сисы:
— Бабын мæ кодтат! — Нарты адæммæ
Хонджытæ фервыстон æмæ мын сымах та
Ме стыр цæхкæртæ куы рафæлдæхтат,
Уæд ма мæ цæсгом нартмæ куыд равдисон!—
Семæ хъаугъайыл куыд æсбæндæн ис,
Афтæ æрбацыдис иу къорд хисдæры,
æмæ гæды Сырдон сæ размæ рауади,
Сæ размæ рауадис æмæ сын дзуры:
— Мæ уырдыгстджытæ фæбыцæу æсты,
Иутæ дзы загътой: «Айк раздæр равзæрдис».
Иннæтæ загътой: «Нæ, карк раздæр уыд»,
æмæ сын афтæмæй хыл бацайдагъ ис,
Рафæлдæхтой мын мæ бæгæнытæ.—
Чи 'рцыдис, уыдон уыцы ныхæстæм
Сæ кæрæдзимæ бакæстытæ кодтой
æмæ сæ хæдзæрттæм фæфардæг æсты.
æрцæуинаг хистмæ чи уыд, уыдон дæр
Базыдтой æмæ нал æрцыдысты.
Сырдон хисты 'фсон цы 'рæмбырд кодта,
Уыдон йæхицæн баззадысты.