Хур дæр ыл нæ кæсы,
Ахуыссы йыл мæй.
Кусарт нæй мæ къæсы,
Кувинаг дæр нæй.
Цух нæ дæ: æрдзæтæ
Нард фосæй – æргæвст.
Иунæг æз – æдзæттæ,
Тыхст æмæ æргъæфст.
Зоныс мын мæ уавæр:
Царды хæрзтæй – цух.
Иу мæгуыры бавæр,
Ма йыл сис дæ къух.
Зоныс мын мæ хъыг дæр:
Бамынæг мæ зынг.
Иу сæныкк хъæздыгдæр
Не скæндзæн дæ фынг.
Бонджынты цытимæ
Хъæлдзæг бонты хынц...
Давæггаг фыдимæ
Карз арахъ хырхынц.
Æз цæрын мæгуырæй,
Нæй куыстæй бæркад.
Рухс дзуарæн цъæх фырæй
Чи скæндзæни кад?
Уастырджи, нæ сæртæ
Де уазæг фæуæд!
Кувы дын мæ зæрдæ,
Уым цæры мæ зæд.
1993 азы 22 ноябрь