Мæрдты уынæргъынц Гракх æмæ Катон,
Фæмард и Брут, – республикæ ныггæндон.
Кæрæф варвартæн сæххæст и сæ фæндон,
Зæгъынц, æрцыд нæргæ Ромæн кæрон.
Мæнгард у цард – ыспаддзах шут Нерон,
Уый Марсы фæзæй сарæзта хæтæндон.
Хæстоны армы сызгæ ис цъæх æндон,
Сæ сæртæ хойынц куырд æмæ хуымон.
Хъайтар гæлхуырæн нал уыди цæвиттон,
Уæддæр дæ риуы Бруты монц нæ мард,
Фæзынд-иу тохмæ фарны бон йæ сиддон.
Мæрдтæм æрвыста тугцъирты йæ кард,
Фыста æхсарæй залымтæн сæ фиддон,
Æмæ-иу ног ысрæсугъд ис дæ цард.
1996 азы 11–12 август