Мæ Иры зæхх, æлгъыстæй
Дæу нардуат хай фæцис...
Уæд иу райсом мæ тыхстæй
Ныхъхъæр кодтон фæдис:
«Ирон фысджытæ! Абон
Ыстыр æмбырд уыдзæн,
Нæ бæстæйы сæраппонд
Ныхас зæгъын хъæудзæн.
Куы рацæуат дзыгуырæй,
Куы разынат уæндон,
Уæд нал цæудзæн мæгуырæй
Ирыстоныл йæ бон,
Уæд сыстдзæни æгасæй
Йæ ингæнæй Къоста...»
Нæртон вæййæм æдасæй...
Ау, чи уыдзæн фæстаг?
Куыд нæ бахауон дисы?–
Æмбырд куы нæ у хæст! –
Фæндзай лæгæй фæдисы
Æртæ рацыд æрмæст.
Сæ уаг æмæ сæ мастæй
Мæ зæрдæйы – æрхъис...
Дыккаг хатт та æвастæй
Ныхъхъæр ластон фæдис:
«Ирон фысджытæ, азæр
Чысыл æмбырд уыдзæн.
Нæ хуыздæрыл уæ азар
Уым бандзарын хъæудзæн».
Ныххæррæтт кодтой!.. Гъæйттæй
Æз-лæгдæрæй тырнынц.
Æрвадæлтæ дыгæйттæй
Æд хъонагътæ тындзынц.
Мæлдзой зæронд – сæ разæй,
Йæ хъузæттæ – кæрзмаст.
Уæдæгондæй, сылвазæй
Хæстмонц ысты, ныфсхаст.
Нæ зондджынтæ сæ хъæстæ
Сæ дæлæвзаг хæссынц...
Цымыдисæй сæ фæстæ
Ирон дзыллæ кæсынц.
Цы лæгтæ сты, цы лæгтæ!
Нæ фæтæгтæ – æфсад.
Сæтдзысты ныр ызнæгты
Нæ зонд æмæ нæ кад!..
Мæ зæрдæ та ыскатай:
Тæссаг ысты, тæссаг!..
Æниу цæгъды сыкъатæй
Æвзæр цуанонты саг...
1990 азы 31 май