Дæхиуыл хъоды бакодтай дæхæдæг,
Йæ бæстæн лæг нæ фæкæны тæргай!
Дзæгъæлдзу фырт æнцой æнхъæл ысхæтæг!
Дæ царды бæлас къалиугай сыгътай.
Нæ уыд кæуæг дæ табæтæн йæ фæстæ,
Кæл-кæлæй худт дæ уæлмæрдыл хъысмæт.
Нæ ивы лæг кæйдæр зæххыл йæ бæстæ,
Хуыздæр у арсæн галуанæй лæгæт.
Фыды уæзæгыл чи райгуырдис мадæй,
Йæ зæххы риуæй чи банызта дон,
Нæ лидзы уый хæтаг сылау æгадæй,
Нæ агуры цæлуарзагау сæндон.
Ныр дын дæ хæррæгъ дард бæстæй æрластой,
Кæнынц нæ дзыллæ сæфтæн дæр æгъдау.
Нæ зæхх фæлтæрд у хъарæг æмæ мастæй,
Дæу дæр та айста не Стыр Мад фыртау.