Фæзынди æлдарæн бындартæ,
Тыхбарыл та скасти йæ хур...
Ныууадзут быцæу, пролетартæ,
Хылмондагæй агурут бартæ,
Уæ къухы – дæрзæг хотых – дур.
Цæмæн ыстут ихсыд, лæгуынтæ?
Æппындæр уæм нал ис æфсарм!
Рæуæг ысты, къаннæг – уæ хуынтæ,
Лæвар нын нæ дæттут уæ бынтæ,
Нæ уадзут ыстигъын уæ царм.
Уæздан ыстæм мах – демократтæ:
Сæудæджер, банкир, журналист.
Нæ хотыхтæ – танктæ, гранаттæ,
Хуыцау сæ рæвдауынæн радта,
Нæ кæны культурон тых цъист.
Цы смарзтой уæ фыдæлтæ тохæй?
Уыдысты сæ бартæн нывонд!
Мах бахызтам дуне фыдохæй,
Лæгуарзон омон уын джебогъæй
Цæстуарзонæй амоны зонд.
Ныр бафсæдут хор æмæ бартæй,–
Æнæвгъау уыл калæм нæмыг.
Æгæр дæр ысхъарм ыстут артæй,
Сæрибар у адæймаг мардæй,
Ныддымдта уын не ‘фсад уæ рыг.
Кæдæм лидзут, уаих, кæцырдæм?
Кæм ма ис уæ сæртæн гæнах?
Ныр амонд æрзылди мæгуыртæм,
Цæй дзæбæх у ахæстон! – уырдæм
Зæрдиагæй хонæм сымах.
æрхастам уын мах демократи,
Нæ фæндон у цардæн закъон.
Æдылытæ, махмæ æфсад и,
Æфсадджынæн кад æмæ рад и,
Тæрхоны тых кæны тæрхон.
1993 азы 10 октябрь