Сырдтау бырстой Ирыстонмæ фыдгултæ,
Уæд Чъребайыл ызгъæр цæхæртæ калд.
Нæ адæмы туг зæххы цæфты скултæ,
Цъæх арты сыгъд нæ цард æмæ нæ кад.
Æрлæууыд уым нæртон фæлтæр сæ разы,
Æвæрдтой нын сæ фæтæн риутæй уарт.
Хъайтары тых хъаймæтæн дæр фæразы,
Бынтон нæ байсæфт иры зæххыл цард.
Нæры уым абон Стыр бæрæгбон радæй,
Бæркады фынгтыл рабадынц æнгом.
Хынцынц рæдау цыты уазджыты кадæй,
Сæ зæрдæтау сæ быркуытæ дæр – гом.
Мæ Ир! Нæ дзыллæ сау зындоны даудта,
Уæд кодтой адон знагимæ цæдис,
Хъайтартыл хастой хахуыр æмæ даутæ,
Нæ сæм уагътой нæ сыхæгтæй фæдис.
Трибун! Сæ тыхстæй бамбæхстай дæ зæрдæ,
Дæ хъарм уатмæ сæ тохы хъæр нæ хъуыст.
Нæ уагътай дзурын тугхортæй æвзæртæ,
Хуыдтай геройты змæнтæг æмæ схуыст.
Ныр дзаг фынгыл хъайтарон зарæг систай,
Æрхауд дæумæ дæр уацамонгæ ныр...
Хъæрзы уæд Присы сгуыхт хæстон йæ ристæй,
Йæ хæдзар – пырх, йæ сау къона – æмыр.
Цæф цæргæс бады рау дурыл æрхуымæй,
Хъæрæй ныууасы рох уæлмæрдты сынт.
Мæ Ир! Уæддæр цæуы бæркад дæ хуымæй,
Дæ сæрмæ тары Бонвæрнон фæзынд.
1995 азы 5 октябрь