Мæ цард мæ зæрдæмæ нæ цæуы,
Мæ хъысмæт разындис æлгъин.
Лæууын мæ дугимæ быцæуыл,
Нæ мын ис удлæууынæн дин.
Цæндыл дæр дуры къæртт нæ арын,
Мæ куыстæй не ‘взæры бæркад.
Куы сисынц царды хæрзтæ уарын,
Мæнмæ уæд никуы хауы рад.
Фæцæф дæн – дойны мын у, дойны!
Уæд Терк дæр айсысы æваст.
Мæ уарзт мыл рахæты æмбойны,
Дзæгъæл мæ никуы уадзы маст.
Лæвар мын чи ракæны судзин,
Уый теман атоны мæнæй.
Хæлæрттæ! ме стджытæ уын судзын,
Уæддæр мыл иу аудæг нæй.
Мæ бæстæ хаст къæсау нырраууат,
Уым нæй лæджы цардæй цæрæн...
Мæлæт! Мæ царды ныв нæ рауад,
Гъей, ды уæддæр ма ныууадз мæн!
Ды бакæн стъæлд удæн тæригъæд,
Уæлæуыл бавзæрстон зындон:
Мæ арв мыл сау мигътæ ныууигъæд,
Ыскæн мæ удхарæн кæрон!
1991 азы 18 сентябрь