Кæны фæлтæргай хæлд мæсыг ныллæг,
Ныббадт нæ фарны суадоны кæфхъуындар.
Ирон Ныхасы нал фендзынæ лæг,
Фæци, мæгуыр, ирон Музæ чызгбындар.
Кæмæн у судзин карз хотых, – уæууæй! –
Нæ хæцы уый мукаратимæ арцæй.
Нæ сахъ лæппутæм ахæм хъару нæй,
Цæмæй Пегасы рацахсой йæ барцæй.
Ирон чызг амазонкæ уыд кæддæр,
Кæм нæ ис тыр, уым буц æхсин хъайтар у.
Нæ буц чызджытæ, бахъуыд нæ уæ сæр,
Уæ бæрны сты нæ цард æмæ нæ хъару.
Уæ фарнæй не сты Хуры цот фыдвæд,
Зæрдæйы ‘взаг нæ рох кæны сымахæй.
Куы скæны ирыл тар замантæ, уæд
Уæ фидауц судзы мах размæ цырагъæй.
Уæ фæрцы ис нæ адæмæн фæндыр,
Мах не скæнæгæн нал кæндзыстæм бустæ.
Сымах бар у поэты сис дæр ныр,
Æмæ уыл Музæ аудæд æнусты.
1999 аз