Фыдгæнæгмæ абон Хуыцау дæр нæ уæнды,
Йæ разы закъон дæр æрхуыссы йæ уæнтыл.
Уый буц æмæ хъал у йæ мыздæй, йæ куыстæй,
Æз дæр æй фæлварын тæссаг хос – æлгъыстæй.
Нæ Ирыл фыдвæндтимæ чи кæны даутæ,
Уый дарæд æнусты йæ хуыздæртыл саутæ,
Уый ихыл ыстонгæй куыдзы сæр фæхæрæд,
Гъе стæй йыл æд мыггаг æрцæуæд ахæрæт.
Нæ адæмыл чи цæуы знагау мæнгардæй,
Хæдзарон нын чи кæны абон лæгмартæй,–
Дæ бындур ныззилæд, дæ цар дыл æркæлæд,
Фæндагыл дзæгъæлæй æрцæуæд дæ мæлæт.
Нæ зæххы гæбазæй цы лæг кæны базар,
Уый баййафæд карзæй, сыгъдæг Зæхх, дæ азар.
Цы знаг калы дуртæ нæ фарны мæсыгæй, –
Дæ къонайы артдзæст ныххуыссæд цæссыгæй.
Нæ дзыллæйы чи кæны хицæнтæ, дихтæ, –
Кæнæд-иу дын сау сынт дæ игæр кæрдихтæ.
Дывзагонæй чи халы махæн нæ сæрзæд,
Уый йе ‘взагæй не скъæт цъылынау фæмæрзæд.
Тæрхоны лæг чи сси хæрам æмæ хинæй,
Уый хъузджы фæцæрæд тыхст æмæ æлгъинæй;
Фыдæвзарæн чи скодта махæн нæ дугæй, –
Дæ хæдзар лæпирæд цæссыг æмæ тугæй.
Мæ Иры ызнæгтæ, æлгъыст уыл æрцæуæд,
Нæ хорзмæ кæсынæй ыскъуыйæд уæ зæрдæ,
Лæдзæг æмæ авгæй фæхойут уæ сæртæ,
Уæ ингæнтыл кафæнт фыдæнæн уæ цæуæт.
1994 азы 29 август