Салам, Атей, – ыстыр паддзах сколоттæй!
Иронау ныр куыд ысдзурон дæ ном?
Фæрсын дæ æз бæлвырд æмæ æргом:
Цæмæй дæ стыр? æрбавдис-ма, цы скодтай?
Фæистай хъалон дактæй æмæ готтæй,
Ыстъæлфыди дæ карды дзæхстæй Ром.
Уыдтæ, зæгъынц, зæрондæй дæр хæстхъом,
Фæлæ бындар кæй ыскодтай дæ цотæй?
Фæтых вæййы куырыхон зонд тыхыл,
Фыдгулты раз ныффалгæрон дæ бæстæ,
Хæты дæ фыдвæд къотырæй зæххыл,–
Нæ сын ныууагътай иу мусонг дæ фæстæ.
Кæм хъазыдтæ тыгъд быдырты бæхыл,
Уым нал арынц уæлмæрдваг зæхх дæ хъæстæ.
1991 азы 3 ноябрь