Мæгуыр æмæ æлгъыст бæстæ! Дæ кæмттæ –
Зæххыскъуыдтæ, дæ лæгъз быдыр – кæвдæс.
Цæуынц дæ цот кæйдæр арæнтæн гæс,
Дæхи дуæрттæ æвæгæсæгæй – гæмттæ.
Мæ Ир, уыдтæ æнæном æмæ кадджын...
Ысхæц дæхиуыл, дуджы фарн ыссар!
Дæ уарзт нын раттæд ныфс æмæ æхсар,
Цæмæй нын уа дæ зæххы рыг дæр адджын.
Дæ хурæй судз нæ удты хæрам арты,
Зæрдæйæ уæнт дæ хъæбултæ бæрзонд,
Ысрухс нын кæн уæздан фæндтæй нæ зонд,
Цæмæй нæ хоной дуне-дзыллæ Нартæ.
1994 азы 5 февраль