Мæ цин лæзæрд халау ныскъуыдтæ,
Мæ хъыгтæй ме рагъыл – уыгæс...
Ызмисыл амадтам мæсгуытæ,
Быдтам æнæ галæй кæвдæс.
Нæ куыстыл худтысты фыдгултæ,
Нæ галуан никуы сси цæттæ.
Æмæ нæ гæнахæн йæ къулты
Цæрдудæй амадтам лæгтæ...
Уæддæр фæлдæхтысты йæ систæ,
Сæ хуылфæй сусæг хъæрзын хъуыст.
Нæ уд нын бахордтой фыднизтæ,
Тыхсаст нæ бакодта фыдгуыст.
Ныббадт нæ къодийы кæфхъуындар,
Уыди нæм сау адзал хæстæг...
Фæзынд нæм уалынмæ пехуымпар,
Нæ ныфс, нæ сæрхъызой – фæтæг!
Йæ фæндæй райхалæм нæ мæсыг,
Йæ дуртæй аразæм æндæр...
Мæнæн та фемæхсы мæ цæссыг,
Нæ хъуысы адæмыл мæ хъæр.
Кæлы нæ амаддзаг, фæлдæхы,
Хъæрзæм йæ хæлддзæгты бын мах.
Уæддæр нæ пехуымпар фæзæгъы:
«Уыдзæн йæ бынаты гæнах».
Нæ куыстмæ бавналæм уæнгмардæй,
Нæ быны зæххы уæлцъар – фаст.
Нæ бæстæ судзы, æмæ артæй
Кæнынц куырысдзаутæ сæ хъазт.
Хæссæм сæрнывæндтæ, нæ тугæй
Ныхасæм дуры уæлæ дур.
Мæлæм нæ фæздæджы хуыдугæй,
Кæуы нæ хъизæмарыл хур.
Ыстджытыл амайæм мæсгуытæ,
Бийæм æвгъæддонæн кæвдæс...
Мæнæн мæ ныфсы хал ныскъуыдтæ,
Мæнæн мæ хъыгты уаргъ – уыгæс.
1990 азы июль