Хæмыцы фырт! Хуыцау æмæ йæ зæдтæ, –
Уырны мæ ныр, – æцæг амардтой дæу.
Цы кæнæм? – Де сгуыхт афтæ æцæг нæу,
Хæрамы тых нæртон тыхæй нæ сæтты.
Уæд Хъæндзæргæс фынæй бацис æрмæст,
Фæсайдта мах рæсугъд фынау дæ кадæг!
Æрыхъал ныр мæрдон фынæйæ цадæг,
Нæ марæн кард – йæхи къухы – æлвæст.
Бырсы нæ бæстæм сау æфсад æвдиутæй,
Хæрынц нын уыдон пелтъыгай нæ зæхх.
Сæ талынг уаты Хуры чызг ныцъцъæх,–
Йæ туг ын цъиры сау уæйыг йæ риутæй.
Зынг ныл æфтауынц Кар æмæ Кæрæф,
Гæлхуыр гуымаг нæ зад хуымты лæгæрды.
Мукара хъазт æрцаразы нæ кæрты,
Æфхæры мах æнæфсармæй Алæф.
Нæ хистæр сын цыты сидтытæ уадзы,
Нæ цоты тугæй не знæгты хынцæм...
Цы кæнæм? Мах – уæнгмард æмæ æдзæм,
Ды та кæныс мæрдон фынæй зæппадзы.
1996 азы сæрд