ТÆХУДЫ
Тæхуды, сæрибарæй ацæр,
Æнæмæтæй арвит дæ бон,
Дæ уавæртæн ма у сæ уацар,
Дæ райгуырдыл ма кæн фæсмон;
Тæхуды, кæмæн ис паддзахад,
Кæмæн у йæ бæстæ йæ бар,
Кæй зæхх у фæрныгæй парахат,
Æрцæуæг кæмæн нæу æлдар;
Тæхуды, историйы рагæй
Кæмæн ис йæ адæмæн ном,
Йæ таурæгъ фыдæлты æвзагæй
Кæй кæны æнусты цæрдхъом;
Тæхуды, æфсæддон парадæй
Кæй сæрдарæн вæййы æгъдау,
Тæрхоны бон кад æмæ радæй
Дзырды бар кæмæн ис лæгау;
Тæхуды, йæ хионты сгуыхтæй
Кæй бæстæ у мадау рæвдыд,
Кæй дзыллæ у фидар йæ тыхтæй,
Кæй фидæн у знæгтæй æвыд;
Тæхуды, кæмæн у йæ фæтæг
Йæ бæсты сæраппонд нæртон,
Пехуымпарау чи у йæхæдæг
Йæ адæмы царды бæззон!