Нæй мæнæн зæххыл мæсыг,
Нал дæн æз хæстхъом фæлладæй.
Зæрдæ, ферох кæн дæ хъыг,
Зонд мæ не скæндзæн хъæздыг,
Цардæн ницы хос у катай.
Хæхты агурын фысым,
Хъуамæ бафсæдон хæрзфынтæй.
Уæд æдзæрæг ком цъысым,–
Æз æрулæфдзынæн уым
Тагъд мæ сау хъыгтæй, мæ зынтæй.
Нал амайын æз мæсыг,
Лæг сæруæлдай у фæлладæй.
Арв мыл калдзæни цæссыг...
Нæй, нæ рох кæны мæ хъыг,
Мемæ балымæн ис катай.
1993 азы 5 апрелъ