Сæфты дуг, сау бонтæ скодта нæ хæхты,
Нал уыдис кæмтты æнцой.
Цагъта цъæх бирæгъ æд балбирæгъ мæргъты,
Нал рæзт сæ къæхты бын цъой.
Сау зым, къуырма бæлон – бабын сæ фылдæр,
Хуымтæй сæм нал хауд нæмыг.
Доны был уалдзæг дæр нал зынд дзывылдар,
Нал уасыд тары дæр уыг.
Уалынмæ сау хохæй сау цæргæс ратахт, –
Бирæгътыл сыстад тымыгъ.
Сцагътой сæ базыртæ мæргътæ дæр уайтагъд,
Равдыста цъиу дæр йæ тых.
Цæргæс цъæх бирæгъы айста йæ разæй,–
Асхъиудта былæй æваст.
Къæбысты апырдтой уыгтæ æгасæй,
Хур та тæхойтыл ыскаст.
Гъæйда-гъа, ахсынц сæхицæн бынæттæ,
Маргъæн йæ ахстон – мæсыг.
Тонынц кæрæдзи, сæ иу дæр нæ сæтты,
Хуымæй та скъæфынц нæмыг.
Азæлынц хох æмæ тархъæд сæ зардæй,
Стæлфы сæ пæр-пæрæй цад...
Цæргæс йæ къæдзæхыл бады æнкъардæй,
Дардмæ фæлгæсы æнцад.
1998 азы 19 январь