Мæ сонт æрбафыхты,
Мæ къæрцц-цæхгæр ныхасы
Ис дурты схъиуды хъæр, нæ донхауæнты нæрд,
Фæлæ мæ зæрдæйы, æнусон ирд налмасау,
Ис айнæг цъититы сыгъдæгдзинад æвæрд.
æмæ хæххон кæсаг æрттивгæ тугдæппæлттæй
Куыд тындзы их-къæйтыл цъæх суадæтты сæрмæ —
Уæрæхуынг горæттæй,
Æнæзмæлгæ пырх дæттæй
Мæн ласы урс хæхтæм мæ хохбæстаг зæрдæ.
Æз хæхты райгуырдтæн.
Нæу ме сфæлдыст мæ бæстæ,
Фæлæ æппынфæстаг дзуапп чи ратдзæн бæстон:
Хъæуынц къæйриу хæхты — æндонбазыр цæргæстæ,
Æви хъуыд цæргæсты — къæйриу хæхты бæрзонд?!