Æз ныхъхъæбыс кæнин æрдзæн,
Æз фæбатæ кæнин зæххæн,
Абон хъæлдзæг дæн æз, хъæлдзæг,
Арвмæ 'рфæнды мæн ыстæхын.
Фæлæ ахæм цины рæстæг,
Чызг, фæрсæй-фæрстæм куы бадæм,
Уæд æрæмысын æз — хæсты
Цас фыдбонтæ федтой адæм...
Цалгай уарзæттæн кæддæрты
Аскъуыдта ызнаг сæ цинад!..
Фæлæ карз фыдвæндты сæрты
Алкæд ахизы рæстдзинад!
...Худы рухс фидæн нæ балцæн
Ирд, зæрæхсиды цæхæрты...
О, куыд хорз ыстут, куы, уалдзæг
Сабыр, рухс хæххон изæртæ!