Фæлæ нæй рæстæг кæуынæн,
Куыд хъыг сайæн у æрмæст,
Цард, цæрын кæй фæнда, уымæн
У фæстаг улæфтмæ хæст.
æмæ хъарæг-зард фæхъус и,
Сцырын фæндыры зыр-зыр,
Арвæй зæхмæ рауагъд къусы
Кафæг, уарийау, ныззылд.
Ссыгъди цæстыты зæрин арт,
Цæнгтæ айтынг кодта: «Гъæйтт!»
Цыма базырджын сæрибар
Сыстад царддæттæг зæххæй.
Ныфс, хъарухæссæг æххуысау
Стынг и рог æмдзæгъд: «æрц-ц! æрц-ц!»
Цыма тохы фæзæй хъуысы
Ссад фæринк кæрдты къæрцц-къæрцц.