Фæлæ мыл баууæнд, чызгай, шахты
Куы федтон дæу хæзнатæ ласгæ,
Дæ ныхыл хиды 'ртах куы 'ртагъди,
Уæд мæм уæлдай рæсугъддæр кастæ.
МАД
Уа цæрæнбонты фæсмойнаг,—
Мад цы хъæбулы нæ хъæуы!..
Саулагъз ацæргæ сылгоймаг
Вагзалы сындæг фæцæуы...
Буцæй иунæг чызджы хаста,
Уый тыххæй лæууыд йæ къахыл,
Æмæ йын куы кодта ахуыр,
Суад-иу ардæм уæд йæ размæ...
Моймæ радта уый кæмæндæр,
(æмæ дард ысты ныр уыдон),
Фæлæ вагзалыл йæ фæндаг
Ракæны уæддæр æрвылбон.
У йын ам цыдæр æхсызгон,
Цард ын адджын нæу æнæ уый,—
Кæд зæрдаивæй йæ чызгæн
Ам йæ къахвæдыл ныллæууид...