«Фæнизджын, дам, уыдзынæ 'взонгæй,
Дæ рæуджыты ныббаддзæн рыг»...
Цыма мæ дариккой æввонгæй,
Раст афтæ стынг вæййы сæ «хъыг».
æз та шахтер дæн æмæ 'мгæрттæй
Мæ цардмæ ничи 'рхæсдзæн фау...
Куы тæрсæм иууылдæр зын рæттæй,
Уæд махæн чи ратдзæн æгъдау?..
Уæд шахтты чи къахдзæн хæзнатæ,
Алтайы чи фæлдахдзæн зæхх?
Ыскæсæн æмæ дард Цæгаты
Заводтæ чи араздзæн,— зæгъ?..
Зынтæ куы нæ уаид, хæлæрттæ,
Куы уаид алцыдæр æнцон,
Уырнæд уæ, уæд, уырнæд, мæ зæрдæ
Нæ зонид циндзинады бон!