Фæлæ мыл куы æрцыд ыстыр хъыджы бон,—
Куы баззадтæн сидзæр мæ мадæй,
Мæхи уæд мæ фыдмæ нылвæстон æнгом,
Уыд афтæмæй къаддæр мæ катай...
æмгæрттимæ дарддæр уæхски-уæхск цыдтæн.
Мæхи-иу мæхинымæр фарстон:
Мæ цин, йе мæ хъыджы бон искуы мæнæн
Куы ничи æрлæууид мæ фарсмæ,
Мæ цин уæд цы уаид? Кæд фæуид мæ хъыг,
Кæдмæ згъорид рустыл мæ цæстыты сыг?
СТЪАЛЫ
Рæстæг афтæ у: уый халы,
Ногæй аразы 'мæ ивы...
Фæлæ мингай азты стъалы
Арвыл судзы æмæ 'рттивы.
Уæдæ мигъты 'хсæнты дардæй
Зæхмæ уый цæхæр æрхæстæг...
Ма тæрс, чи рахауди арвæй,
Метеор уыд уый æрмæстдæр.
...Уыцы стъалыйау уæд царды
Ирд, æнæмæлгæ дæ хъуыды!
Бонтимæ кæй ном фæтар и,
Уый æцæг поэт нæ уыди.