Тæккæ знон дæр ма чи хъазыди хъулæй,
Мæт фыны дæр кæмæ нæ цыд хæстæг,
Гъе уыцы цардмонц сабитæ сæркъулæй
Ныр кастысты сæ фыдæлты фæстæ.
æцæг цыма сæхимидæг æмбæрстой
Сæ фыдæлты фæстаг ныхæсты уæз,
Йæ карз æртхъирæн хъазæгау фæдзæхстæн:
«Ды ныр лæг дæ 'мæ хæдзармæ фæкæс!..»
2
Хæст хæрзрох нæ ныууагъта мæн дæр
Мæн хæстхъомæй не 'рыййæфта хæст,
Тохфæдыл нæ фæцыдтæн æдгæрзтæ,
Фæлæ федтон хæсты хуызы æз
Сау низау, æнæхатыр фыдрæстæг.
«Хæст...» Уæд хъусын бомбæты хъæрзын,
Хъустæ 'хгæнынц танкæты гуыр-гуырæй,
Цæстыл уайы бардæйы кæрдзын,
Æмæ згæхæрд телтæй конд æрмгуырой...
Хæст хæрзрох нæ ныууагъта мæн дæр,
Хæст мæныл дæр йе 'знæт къух æрсæрфта,
Зæрдыл дарын акъоппы мæйдар
Æмæ тарст, æнæхуыссæг æхсæвтæ...
3
Гæркъæраг куы уасыд...
Раздæр-иу нæм гæркъæраг куы уасыд,
Ракаст-иу уæд тæрхæгæй мæ мад
Æмæ «О, цæудзæни та нæм уазæг»,
Зæгъгæ, стыр цыдæр цинхуызæй бадт...
Фæлæ – хæст!.. Ныр гæркъæраджы уастмæ
Мады 'нгасы цавæрдæр мæт зынд:
«Чи уыдзæн æнæнхъæлæджы уазæг?
Цин æрхæсдзæн уый æви цæссыг?..»
4
Фæсхæст
Мах фæсхæст нæ дард зианты хабæрттæ
Сайд æнхъæл, нæ мадæлтæн нæ загътам...
Мах фæсхæст сармадзанты хæтæлтæ
Над зæххы быруйы михтæн сагътам...
Мах фæсхæст нæ хистæрты фæзмыдтам,
Даргъфæдджи пырх цинелты цыдыстæм…
Мах нæ сонт рæстзæрдæтæй нæ зыдтам,
Ныр хæдзары хистæртæ кæй сыстæм...
5
Зонын
Æз къæмдзæстыг абон дæр нæ дæн,
Стæй кæнын мæн ничи кæны сомы,
Фæлæ хæст куы 'рыййæфтаид мæн
Знаджы ныхмæ рацæуæг хæстхъомæй,
Уæд кæм уыд уæлдай зын æмæ карз,
Тохвæлтæр кæм фæхъуыдысты мингай,
Уым мæнæн дæр раззагдæрты раз
Уаид хъуамæ ме 'нæбæрæг ингæн…